Published on 11 Oct, 2023
កម្មវិធីព្យុហយាត្រាឆ្ពោះទៅបញ្ឈប់អំពើជួញដូរមនុស្ស លើកទី២ ឆ្នាំ២០២៣ នៅខេត្តសៀមរាប
គ.ខ.ប.ជ សៀមរាប៖ នាព្រឹកថ្ងៃពុធ ១២រោច ខែភទ្របទ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១១ ខែតុលា ឆ្នាំ២០២៣ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គ.ជ.ប.ជ បានអញ្ជើញជាគណៈអធិបតីក្នុងកម្មវិធី ព្យុហយាត្រាឆ្ពោះទៅបញ្ឈប់អំពើជួញដូរមនុស្ស លើកទី២ ឆ្នាំ២០២៣ ដែលរៀបចំដោយ គណៈកម្មា ធិការប្រយុទ្ធប្រឆាំងអំពើជួញដូរមនុស្សខេត្តសៀមរាប សហការជាមួយ សហការគាំទ្រដោយអង្គការមូលនិធិ អេ២១ និងរដ្ឋបាលខេត្តសៀមរាប។ សមាសភាពអញ្ជើញចូលរួម រួមមានមន្ត្រីរាជការ កងកម្លាំងនគរបាល កងរាជអាវុធហត្ថ លោកគ្រូអ្នកគ្រូ សិស្សានុសិស្ស យុវជនកាយរិទ្ធ យុវជនកាកបាទក្រហម បុគ្គលិកអង្គការសមាគមន៍ ព្រមទាំងភ្ញៀវជាតិ និងអន្តរជាតិ សរុបប្រមាណ ៦០០នាក់ ។
គោលបំណងនៃការធ្វើព្យុហយាត្រានេះឡើង គឺដើម្បីចូលរួមយុទ្ធនាការណ៍សកល ដើម្បីក្រើងរំឭកដល់សារធារណៈជន កុំឲ្យភ្លេចខ្លួនថា ឧក្រិដ្ឋជនគឺនៅគ្រប់ទីកន្លែង មនុស្សគ្រប់វ័យ គ្រប់ភេទ គ្រប់សាសនា គ្រប់និន្នាការ គឺសុទ្ធតែអាចក្លាយជាជនរងគ្រោះដោយអំពើ ជួញដូរមនុស្ស និងអំពើកេងប្រវ័ញ្ចដទៃទៀត។ ជនរងគ្រោះត្រូវតែទទួលបានការសង្គ្រោះ និងផ្តល់យុត្តិធម៌ ហើយជនល្មើសត្រូវតែបានបង្ក្រាប និងផ្តន្ទាទោស។
យោងប្រសាសន៍ លោកជំទាវ យូ សុភា អភិបាលរងនៃគណៈអភិបាលខេត្ត និងជាអនុប្រធានអចិន្រ្តៃយ៍ នៃគ.ខ.ប.ជ ខេត្តសៀមរាប បានបញ្ជាក់ថា ខេត្តសៀមរាប ជាប៉ូលទេសចរណ៍មួយដ៏សំខាន់ ដែលមានប្រាសាទអង្គរវត្ត ជាសម្បត្តិបេតិកភណ្ឌពិភពលោក និងមានតំបន់ទេសភាពធម្មជាតិអេកូទេសចរណ៍ជាច្រើនកន្លែងផ្សេងទៀត សម្រាប់ភ្ញៀវទេសចរទស្សនាកម្សាន្ត។ ទន្ទឹមនឹងផលវិជ្ជមានពីសេវាកម្មទេសចរណ៍ ក៏យើងបានទទួលរងផលជាអវិជ្ជមានផងដែរ ពីអ្នកទេសចរណ៍មួយចំនួន ដែលមានបំណងទុច្ចរិត បានប្រព្រឹត្តបទល្មើសរំលោភបំពាន ការកេងប្រវ័ញ្ចផ្លូវភេទទៅលើកុមារ តាមរូបភាពផ្សេងៗ និងការយកខេត្តសៀមរាប ជាខេត្តសម្រាប់ឆ្លងកាត់ការនាំចេញមនុស្សដោយខុសច្បាប់ និងកន្លែងសម្រាប់ប្រព្រឹត្តបទល្មើសផងដែរ ។
លោកជំទាវ ជូ ប៊ុនអេង អនុប្រធានអចិន្រ្តៃយ៍គ.ជ.ប.ជ ក៏បានលើកឡើងថា កម្មវិធីព្យុះហយាត្រាឆ្ពោះ ទៅបញ្ឈប់ អំពើជួញដូរមនុស្ស ក្នុងគោលបំណង បង្ហាញអំពីឆន្ទះមុះមុតរបស់រាជរដ្ឋាភិបាលកម្ពុជា និង ប្រជាពលរដ្ឋគ្រប់រូបក្នុងការរួមគ្នា បង្ការបង្រ្កាប ផ្តន្ទាទោស សង្រ្គោះ និង ការពារ ដើមី្បកម្ពុជាបញ្ឈប់អំពើជួញដូរមនុស្ស។ លោកជំទាវ ក៏សង្ឃឹមថា ការបា្ររព្ធកម្មវិធីព្យុះហយាត្រាឆ្ពោះ ទៅបញ្ឈប់អំពើជួញដូរមនុស្សនេះនឹងជួយ បំផុសកិច្ចចូលរួមក្នុងការអនុវត្តច្បាប់ ស្តីអំពីការជួញដូរមនុស្ស ការធ្វើអាជីវកម្មផ្លូវភេទលើ ស្រ្តីនិងកុមារឱ្យកាន់តែកាន់តែផុសផុលបន្ថែមទៀត ៕
