អបអរសាទរ ទិវាប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០២២ លើកទី១៦ !

BY SOM SIVWIN

Published on 15 Dec, 2022

អបអរសាទរ ទិវាប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០២២ លើកទី១៦ !

សាលមហោស្រពកោះពេជ្រ៖ នារសៀលថ្ងៃចន្ទ ៤រោច ខែមិគសិរ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី១២ ខែធ្នូ ឆ្នាំ២០២២ គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស គជបជ បានប្រារព្ធទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០២២ លើកទី១៦ ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង នាយករដ្ឋមន្រ្តីស្តីទី នៃរាជរដ្ឋាភិបាលកម្ពុជានៅសាលមហោស្រពកោះពេជ្រ ។


ក្នុងកម្មវិធីនោះផងដែរ ការមានការយាង និងនិមន្តរបស់ព្រះថេរានុត្ថេរ:គ្រប់ព្រះអង្គ និងការអញ្ជើញចូលរួម ផ្តល់កិត្តិយសពីសំណាក់ឯក​ឧត្តម លោក​ជំទាវ ជាថ្នាក់ដឹកនាំគ្រប់ស្ថាប័ន រដ្ឋសភា ព្រឹទ្ធសភា រាជរដ្ឋាភិបាល តំណាងអង្គទូត និងស្ថានបេសកកម្មនៃប្រទេសជាមិត្តនានា ដែលមាននិវេសនដ្ឋាននៅព្រះរាជាណាចក្រកម្ពុជា ឯកឧត្តម លោក ជំទាវ តំណាងអង្គការសហប្រជាជាតិ ដៃគូអភិវឌ្ឍន៍ជាតិ-អន្តរជាតិ ឯកឧត្តម​ លោកជំទាវ បណ្ឌិតសភាចារ្យ សាស្រ្តាចារ្យ នៃរាជបណ្ឌិត្យសភាកម្ពុជា សាកលវិទ្យាល័យរដ្ឋ និងឯកជន ឯកឧត្តម លោកជំទាវ អគ្គស្នងការ អគ្គស្នងការរង មេបញ្ជាការ មេបញ្ជាការរង លោកជំទាវអភិបាល អភិបាលរងរាជធានីខេត្ត អាជ្ញាធរគ្រប់លំដាប់ថ្នាក់ លោកគ្រូ អ្នកគ្រូ កងកម្លាំងគ្រប់ប្រភេទ ទាំងជើងទឹក ជើងគោក ជើងអាកាស លោក លោកស្រីជាតំណាងផ្នែកឯកជន សង្គមស៊ីវិល តំណាងកម្មករ និយោជិត បុព្វជិតសាសនាគ្រប់និកាយ ភ្ញៀវ​ជាតិ អន្តរជាតិ យាយជី តាជី ក្មួយៗយុវជន យុវនារី និស្សិត សិស្សា​នុសិស្ស ក្រុមយុវជនកាយរឹទ្ធ និងយុវជនកាកបាតក្រហមកម្ពុជា ប្រជាពលរដ្ឋ ដែលសរុបប្រមាណជាង ៣០០០ អង្គ/នាក់ ។

គោលបំណងនៃការប្រារព្ធទិវាជាតិ១២ធ្នូនេះ គឺដើម្បីបញ្ជាក់ជូនជនរួ​ម​ជាតិ និងសហគមន៍អន្តរជាតិឲ្យបានជ្រាប​ថា  រាជរដ្ឋា​ភិបាលនៃព្រះរាជាណាចក្រកម្ពុជា​ នៅតែបន្តកិច្ចខិតខំប្រឹងប្រែងនិង យក​​ចិត្ត​ទុក​ដាក់​កាន់តែខ្លាំងក្លាក្នុង​ការ​ការពារប្រជា​​​ពល​រដ្ឋ ប្រទេសជាតិពីភាពរងគ្រោះទាំង​ឡាយដោយ​ឧក្រឹដ្ឋកម្ម​ជួញដូរ​មនុស្ស ដែលបានបង្កឲ្យមានវិនាសកម្ម ជាថ្មីដល់មនុស្សជាតិ ហើយបាន និងកំពុងក្លាយជាទាសភាពសម័យទំនើបគួរឲ្យភ័យខ្លាច និងស្អប់ខ្ពើម ។ មិទ្ទិញអបអរសាទរនេះ ក៏បានបង្ហាញនូវស្មារតីសាមគ្គីភាព ជាមួយដៃគូរពាក់ព័ន្ធជាតិ និងអន្តរជាតិក្នុងការប្រយុទ្ធប្រឆាំងអំពើជួញដូរមនុស្ស ដើម្បីសុវត្ថិភាព និងការអភិវឌ្ឍន៍ជាតិ។ មិទ្ទិញអបអរសាទរ១២ធ្នូនេះផងដែរ ក៏ជាការរួមចំណែកដ៏ធំធេង ក្នុងការលើកកម្ពស់ សន្តិសុខសុវត្ថិភាពសង្គម និងសន្តិសុខជាតិឲ្យមានស្ថេរភាព ដើម្បីធ្វើជាមូលដ្ឋានគ្រិះនៃការអភិវឌ្ឍន៍ជាតិគ្រប់វិស័យស្របតាមគោលដៅអភិវឌ្ឍន៍ប្រកបដោយចីរភាព។ យុទ្ធនាការនេះនឹងបន្តធ្វើយ៉ាងគគ្រឹកគគ្រេងផងដែរ តាមបណ្តាខេត្ត និងតាមប្រព័ន្ធផ្សព្វផ្សាយនានា ដើម្បីបញ្ជ្រាបការយល់ដឹងទៅដល់ប្រជាពលរដ្ឋនៅទូទាំងប្រទេស ៕

 

 

 

 

 


   

Official Telegram NCCT Cambodia